मुंबई, दि. ११
केंद्र शासनाच्या पीएम सूर्यघर, मुफ्त बिजली योजनेतंर्गत राज्यातील शासकीय इमारतींवर सौरऊर्जा प्रकल्पाची प्रभावी अमंलबजावणी करण्यासाठी ‘मॉडेल शासकीय सोलर जिल्हा’ स्पर्धेचे आयोजन करण्यात आल्याची माहिती, अपारंपरिक उर्जा मंत्री अतुल सावे यांनी आज येथे दिली.
राज्यातील सर्व शासकिय कार्यालयांवर सौर उर्जा प्रकल्पाची अमंलबजावणी होण्यासाठी अपारंपरिक उर्जा विभागाने पुढाकार घेतला आहे. ज्या जिल्ह्यात जलद गतीने शासकिय इमारतींचे सौरिकरण करण्यात येईल, त्या जिल्ह्यास‘मॉडेल शासकीय सोलार जिल्हा’ म्हणून घोषित केले जाईल. यासाठी स्पर्धा घेतली जाणार असून यात सहभाग घेण्यासाठी विहित नमुन्यातील पत्र संबंधित जिल्हाधिकारी व महाव्यवस्थापक (महाऊर्जा) यांना प्रमाणित करून पाठवावे लागणार आहे.
महाउर्जामार्फत पत्रांची छाननी केल्यानंतर ज्या जिल्ह्यात सर्वाधिक सौर उर्जा प्रकल्प स्थापित होतील, अशा जिल्ह्यांना मॉडेल शासकीय जिल्हा म्हणून जाहीर करण्यात येईल.
१ ऑगस्ट ते ३१ डिसेंबर २०२५ पर्यंत ही स्पर्धा घेण्यात येईल. प्रथम विजेत्यास पाच लाख रुपये, सन्मानपत्र व स्मृतीचिन्ह देण्यात येईल. द्वितीय पारितोषिक ३ लाख तर तृतिय पारितोषिकासाठी १ लाख रुपये दिले जाणार आहेत. नागरी सेवा दिनी( २१ एप्रिल २०२६) रोजी मा. मुख्यमंत्री यांच्या हस्ते संबंधित जिल्हाधिकाऱ्यांना पुरस्कारांचे वितरण करण्यात येईल.
“या योजनेचे प्रभावी अमंलबजावणी करण्यासाठी सर्व जिल्हांनी सक्रीय सहभाग नोंदवावा .”असे, आवाहन अपारंपरिक उर्जा मंत्री अतुल सावे यांनी केले आहे.
