*दुष्काळग्रस्त शेतकरी व गोशाळांच्या मदतीसाठी महापारेषणचे आवाहन*

*दुष्काळग्रस्त शेतकरी व गोशाळांच्या मदतीसाठी महापारेषणचे आवाहन*
————————-
*मुख्यमंत्री देवेंद्र फडणवीस यांच्या आवाहनाला प्रतिसाद*
————————
*अपर जिल्हाधिकारी तथा कार्यकारी संचालक सुचिता भिकाने यांचा सामाजिक बांधिलकीचा पुढाकार*
————————
*भेटवस्तू, मिठाई व पुष्पगुच्छांवरील खर्च टाळून गरजूंना मदतीचा हात देण्याचे आवाहन*
———————–
मुंबई, दि. १९ : महाराष्ट्रातील दुष्काळसदृश परिस्थितीमुळे संकटात सापडलेल्या शेतकरी बांधवांना आणि गोशाळांना मदतीचा हात देण्यासाठी महाराष्ट्र राज्य विद्युत पारेषण कंपनीने (महापारेषण) सामाजिक बांधिलकीचा पुढाकार घेतला आहे. राज्याचे मुख्यमंत्री श्री. देवेंद्र फडणवीस यांनी केलेल्या मदतीच्या आवाहनाला प्रतिसाद देत महापारेषणचे अध्यक्ष व व्यवस्थापकीय संचालक विक्रम कुमार (भा.प्र.से.) यांच्या नेतृत्वाखाली अपर जिल्हाधिकारी तथा महापारेषणच्या कार्यकारी संचालक (मानव संसाधन) सुचिता भिकाने यांनी कंपनीतील सर्व अधिकारी व कर्मचाऱ्यांना दुष्काळग्रस्तांच्या मदतीसाठी पुढे येण्याचे आवाहन केले आहे.

महाराष्ट्रातील विविध भागांत पाणीटंचाई आणि प्रतिकूल परिस्थितीमुळे शेतकरी तसेच गोशाळांसमोर अनेक अडचणी निर्माण झाल्या आहेत. अशा परिस्थितीत समाजातील प्रत्येक घटकाने आपल्या क्षमतेनुसार मदतीचा हात पुढे करणे आवश्यक आहे. याच भावनेतून भिकाने यांनी अधिकारी व कर्मचाऱ्यांना सामाजिक संवेदनशीलता जपण्याचे आवाहन केले आहे.

*भेटवस्तूंऐवजी मदतीची संस्कृती रुजवूया*

कार्यालयीन किंवा वैयक्तिक भेटीप्रसंगी पुष्पगुच्छ, मिठाई अथवा भेटवस्तू देण्याची प्रथा आहे. मात्र, अशा वस्तूंवर होणारा खर्च टाळून ती रक्कम दुष्काळग्रस्त शेतकरी आणि गोशाळांच्या मदतीसाठी वापरल्यास त्यातून खऱ्या अर्थाने सामाजिक बांधिलकी जपली जाईल, असा सकारात्मक संदेश श्रीमती भिकाने यांनी दिला आहे.

केवळ मोठ्या आर्थिक मदतीतूनच नव्हे, तर छोट्या योगदानातूनही समाजात मोठा बदल घडविता येतो. दहा रुपयांपासून दहा हजार रुपयांपर्यंत किंवा आपल्या आर्थिक क्षमतेनुसार केलेली कोणतीही ऐच्छिक मदत संकटग्रस्तांसाठी मोलाची ठरू शकते. मदतीची रक्कम किती आहे, यापेक्षा त्यामागील संवेदनशीलता आणि सामाजिक जबाबदारीची भावना अधिक महत्त्वाची असल्याचे त्यांनी अधोरेखित केले.

*शेतकऱ्यांच्या संकटात त्यांच्या पाठीशी उभे राहण्याची गरज*
महाराष्ट्राच्या अर्थव्यवस्थेचा कणा असलेला शेतकरी प्रतिकूल नैसर्गिक परिस्थितीशी सातत्याने संघर्ष करीत असतो. दुष्काळामुळे शेतीबरोबरच पशुधनाच्या चारा-पाण्याचा प्रश्नही गंभीर बनतो. अशा वेळी शेतकऱ्यांना आधार देणे आणि गोशाळांना आवश्यक मदत उपलब्ध करून देणे ही सामूहिक सामाजिक जबाबदारी आहे.

महापारेषण ही राज्याच्या विकासाला ऊर्जा पुरविणाऱ्या वीज पारेषण व्यवस्थेतील महत्त्वाची सार्वजनिक क्षेत्रातील कंपनी आहे. वीज पारेषणासारखी अत्यावश्यक सेवा बजावत असतानाच सामाजिक उत्तरदायित्वाची जाणीव ठेवून गरजूंच्या मदतीसाठी पुढे येणे, हीदेखील संस्थेच्या कार्यसंस्कृतीची महत्त्वाची बाजू आहे.

*माणुसकीचा संदेश देणारा स्तुत्य उपक्रम*

सुचिता भिकाने यांच्या या आवाहनातून अनावश्यक खर्चाला फाटा देऊन सामाजिक हितासाठी योगदान देण्याचा विधायक संदेश देण्यात आला आहे. अधिकारी व कर्मचाऱ्यांनी स्वेच्छेने आपल्या क्षमतेनुसार दुष्काळग्रस्तांना मदत करावी, असे आवाहन करण्यात आले आहे.

या उपक्रमातून सामाजिक संवेदनशीलता, परस्पर सहकार्य आणि माणुसकीची भावना अधिक दृढ होण्यास मदत होणार आहे.

“आपल्यावरील प्रेम आणि शुभेच्छा व्यक्त करण्यासाठी महागड्या भेटवस्तूंची आवश्यकता नाही. त्याऐवजी संकटात सापडलेल्या शेतकरी बांधवांना आणि गोशाळांना मदत करणे, हीच खरी माणुसकी आहे. आपल्या छोट्याशा योगदानातूनही एखाद्या गरजू कुटुंबाला मोठा आधार मिळू शकतो. त्यामुळे महापारेषणच्या सर्व अधिकारी व कर्मचाऱ्यांनी स्वेच्छेने आणि आपल्या क्षमतेनुसार या सामाजिक कार्यात सहभागी व्हावे.”

*- सुचिता भिकाने*
*अपर जिल्हाधिकारी तथा कार्यकारी संचालक (मानव संसाधन), महापारेषण*