*मुख्य निवडणूक अधिकारी, महाराष्ट्र यांच्या कार्यालयाकडून SIR 2026 बाबत महत्त्वाच्या सूचना जारी*
*MAI MEDIA 24 | मुंबई, दि. 30 सप्टेंबर 2026*
मुख्य निवडणूक अधिकारी, महाराष्ट्र राज्य यांच्या कार्यालयाने विशेष सखोल पुनरीक्षण कार्यक्रम (Special Intensive Revision – SIR) 2026 अंतर्गत नोटीसीसंदर्भात महत्त्वाच्या सूचना जारी केल्या आहेत. सह सचिव व सह मुख्य निवडणूक अधिकारी मनोहर पारकर यांच्या स्वाक्षरीने दि. 30 सप्टेंबर 2026 रोजी हे पत्रक जारी करण्यात आले आहे.
हे पत्र बृहन्मुंबई महानगरपालिका आयुक्त तथा जिल्हा निवडणूक अधिकारी, सर्व अतिरिक्त जिल्हा निवडणूक अधिकारी आणि सर्व जिल्हाधिकारी तथा जिल्हा निवडणूक अधिकारी यांना पाठवण्यात आले आहे.
*काय आहेत 10 महत्त्वाचे निर्देश?*
*1. No Mapping आणि Logical Discrepancies बाबत दिलासा:*
ज्या मतदारांची जुळवणी झाली नाही (No Mapping) किंवा तार्किक विसंगती (Logical Discrepancies) आहे, अशा मतदारांना नोटीसमध्ये सुनावणीसाठी उपस्थित राहण्याची सूचना छापली गेली आहे. मात्र आयोगाच्या सुधारित सूचनेनुसार अशा मतदारांना सुनावणीसाठी येण्याची आवश्यकता नाही. त्यामुळे नोटीसीवर “प्रत्यक्ष सुनावणीसाठी उपस्थित राहण्याची आवश्यकता नाही” असे BLO मार्फत लिहून द्यावे. व्हॉट्सॲप किंवा अन्य ऑनलाईन माध्यमातून नोटीस पाठवताना हा संदेशही पाठवावा जेणेकरून मतदाराच्या मनात संभ्रम राहणार नाही.
*2. मोबाईल-व्हॉट्सॲपवर संपर्क:*
ज्या मतदारांना आधीच नोटीसा पाठवण्यात आल्या आहेत, त्यांना मोबाईल, व्हॉट्सॲपवर संपर्क करून सुनावणीसाठी येण्याची गरज नाही, फक्त आवश्यक कागदपत्रे तयार ठेवा, अशी सूचना द्यावी.
*3. BLO घरोघरी जाणार:*
BLO (मतदान केंद्रस्तरीय अधिकारी) यांनी संबंधित मतदाराच्या घरी प्रत्यक्ष भेट देऊन मतदार किंवा त्यांच्या नातेवाईकांकडून आवश्यक कागदपत्रे गोळा करावीत. ही कागदपत्रे आणि BLO चा पंचनामा/अहवाल ECI Net वर BLO ॲपद्वारे अपलोड केल्यानंतर ERO/AERO निर्णय घेतील. अशा प्रकरणात मतदाराला सुनावणीसाठी बोलावण्याची गरज नाही. मतदारांनी ऑनलाईन किंवा व्हॉट्सॲपवर कागदपत्रे/पुरावे पाठवले तरी त्याची पडताळणी करून निर्णय घेता येईल.
*4. राजकीय पक्षाची मदत घेऊ नये:*
मतदाराशी संपर्क आणि कागदपत्रे गोळा करताना BLO यांनी राजकीय पक्षाच्या मतदान केंद्रस्तरीय प्रतिनिधीची मदत घेऊ नये.
*5. ऑनलाईन सुनावणीची सुविधा:*
केवळ अपवादात्मक प्रकरणात उपलब्ध सेवा माध्यमातून ऑनलाईन सुनावणी घेता येईल. त्यासाठी मतदाराऐवजी त्यांनी प्राधिकृत केलेल्या कुटुंबातील कोणत्याही प्रौढ व्यक्तीस सुनावणीस हजर राहता येईल.
*6. विशेष शिबिरे – 3, 4, 10, 11 ऑक्टोबर:*
मतदारांच्या नोंदणीसाठी दि. 3, 4, 10 व 11 ऑक्टोबर 2026 रोजी विशेष शिबिरे (Special Camps) आयोजित करण्याचे निर्देश देण्यात आले आहेत. या शिबिरामध्ये वर नमूद केलेल्या गटातील मतदार कागदपत्रे स्वतःहून सादर करत असल्यास ती स्वीकारण्यात यावीत.
*7. कोणाचंही नाव घाईत वगळू नका – सर्वात महत्त्वाचं:*
जुळवणी न झालेल्या किंवा तार्किक विसंगती असलेल्या मतदाराबाबत पर्याप्त पुरावे उपलब्ध झाले नसतील किंवा प्राप्त कागदपत्रांच्या आधारे सकारात्मक निर्णय घेणे शक्य नसेल तर नाव वगळण्याचा निर्णय घेण्यापूर्वी:
– संबंधित मतदाराला कागदपत्र सादर करण्यासाठी पुरेशी संधी देणे, सुनावणी घेणे अनिवार्य आहे.
– अशा प्रकरणी पात्र मतदार मतदार यादीतील समावेशापासून वंचित राहणार नाही व मतदाराच्या हक्कावर बाधा येणार नाही याची खातरजमा करण्याची जबाबदारी ERO ची राहील.
– कोणताही नकारात्मक निर्णय घाईगडबडीने न घेता पूर्ण शहानिशा करून ERO स्तरावरच घ्यावा.
– अंतिम निर्णयापूर्वी मतदाराच्या नावांची यादी राजकीय पक्षांच्या प्रतिनिधींना द्यावी.
– चुकीची कारवाई होणार नाही याची दक्षता घ्यावी.
*8. तांत्रिक सुधारणा:*
ECINET सॉफ्टवेअर आणि BLO ॲप मध्ये आवश्यक सुधारणा करण्याची कार्यवाही आयोग स्तरावर सुरू आहे, लवकरच कळवण्यात येईल.
*9. दुर्बल घटकांना विशेष मदत:*
रात्र-निवाऱ्यात राहणारे, बेघर, कामगार, गरीब, आदिवासी समाजातील विशेषतः PVTG गटातील व्यक्ती, अनाथ, सेक्स वर्कर्स अशा असुरक्षित गटातील मतदारांकरिता त्यांच्या सोयीनुसार विशेष शिबिरे/मदत कक्ष स्थापन करून सहकार्य करावे. कागदपत्र उपलब्ध नसल्यास राजकीय पक्षांचे प्रतिनिधी, सामाजिक संस्था, अनाथ-संगोपन संस्था यांची मदत घ्यावी.
*10. मतदारांना त्रास नको:*
मतदारांना कोणतीही असुविधा होणार नाही याची दक्षता घ्यावी. सर्व ERO, AERO, BLO यांच्या निदर्शनास या सूचना आणाव्यात व काटेकोरपणे पालन होईल याची दक्षता घ्यावी.
*MAI MEDIA 24 साठी ही बातमी महत्त्वाची आहे – सर्व मतदारांनी आपल्या BLO शी संपर्क साधावा आणि 3, 4, 10, 11 ऑक्टोबरच्या विशेष शिबिराचा लाभ घ्यावा.*
—
स्रोत: मुख्य निवडणूक अधिकारी कार्यालय, महाराष्ट्र – क्रमांक: ईएलआर-2026/प्र.क्र.70/भाग 9/निवडणूक-6, दि. 30 सप्टेंबर 2026
