*दुचाकी अपघातात जखमींना दिला तात्काळ मदतीचा हात*
मुंबई, दि. २५. शेवगाव-पाथर्डी महामार्गावर रविवारी दुपारी भर पावसात दोन दुचाकीस्वारांमध्ये भीषण अपघात झाला. यामध्ये तीन जण गंभीर जखमी झाले. यावेळी मार्गावरून प्रवास करत असलेल्या राज्याच्या महिला व बालकल्याण राज्यमंत्री मेघना बोर्डीकर यांच्या लक्षात हा प्रसंग येताच त्यांनी प्रसंगावधान राखत रस्त्यावर उतरून स्वतः मदतीसाठी पुढाकार घेतला.
घटनेदरम्यान मुसळधार पाऊस कोसळत होता. पावसाची तमा न बाळगता राज्यमंत्री बोर्डीकर यांनी अपघातस्थळी थांबत जखमींची विचारपूस केली. त्यांनी आपल्या ताफ्यातील पोलीस गाडी थांबवत ती जखमींना रुग्णालयात पाठवण्यासाठी दिली. तसेच जखमींवर तातडीने वैद्यकीय उपचार होतील यासाठी रुग्णालय प्रशासनाशी संपर्क साधत आवश्यक ती सर्व मदत उपलब्ध करून देण्याचे निर्देशही पोलीस अधिकाऱ्यांना दिले.
अपघात झाल्यानंतर काही काळ महामार्गावर वाहतूक विस्कळीत झाली होती. उपस्थित नागरिकांनी देखील मदतीसाठी पुढे येत पोलीस आणि आपत्कालीन सेवांना माहिती दिली. जखमींवर स्थानिक रुग्णालयात उपचार सुरू असून, सध्या त्यांची प्रकृती स्थिर असल्याचे सूत्रांकडून सांगण्यात आले.
राज्यमंत्री बोर्डीकर यांचा हा संवेदनशील व तात्काळ प्रतिसाद सामाजिक जाणिवेचे उदाहरण ठरतो आहे. त्यांच्या या कृतीमुळे नागरिकांमध्ये त्यांच्या विषयी कौतुकाची लाट उसळली आहे.
दरम्यान, या अपघातामुळे पाथर्डी-बीड महामार्गावरील वाहतूक सुरक्षेच्या उपाययोजनांबाबत प्रश्न उपस्थित झाले आहेत. स्थानिक नागरिकांनी या मार्गावर गतीरोधक, इशारा फलक आणि सीसीटीव्ही कॅमेऱ्यांची मागणी केली आहे, जेणेकरून भविष्यात अशा दुर्घटना टाळता येतील.
घटनेचा पुढील तपास स्थानिक पोलीस करत असून, अधिकृत माहिती मिळताच ती जाहीर केली जाईल.
००००००००
