आमदार रोहितदादा पवार यांच्या नेतृत्वाखाली CET सेलचे आयुक्त दिलीप सरदेसाई यांची भेट घेऊन निवेदन सादर
राष्ट्रवादी काँग्रेस शरदचंद्र पवार पक्षाच्या शिष्टमंडळाची आयुक्तांशी सविस्तर चर्चा
“गुणवंत विद्यार्थ्यांना न्याय न मिळाल्यास राष्ट्रवादी काँग्रेस तीव्र आंदोलन करेल” — ॲड. अमोल मातेले
मुंबई, दि. २८ जुलै : लाखो गुणवंत विद्यार्थ्यांच्या भविष्याशी आणि त्यांच्या स्वप्नांशी संबंधित असलेल्या MHT-CET परीक्षेतील कथित अनियमितता व गैरप्रकारांच्या आरोपांची निष्पक्ष, पारदर्शक आणि सखोल चौकशी करण्यात यावी, या मागणीसाठी आज आमदार रोहितदादा पवार यांच्या नेतृत्वाखाली राष्ट्रवादी काँग्रेस पार्टी शरदचंद्र पवार पक्षाच्या प्रमुख पदाधिकाऱ्यांच्या शिष्टमंडळाने CET सेलचे आयुक्त दिलीप सरदेसाई यांची भेट घेऊन निवेदन सादर केले.
या भेटीदरम्यान MHT-CET परीक्षेच्या निकालांबाबत विद्यार्थ्यांमध्ये निर्माण झालेल्या शंका, विविध माध्यमांतून समोर आलेले कथित गैरप्रकार, काही परीक्षा केंद्रांबाबत उपस्थित करण्यात आलेले प्रश्न तसेच गुणवंत विद्यार्थ्यांवर होऊ शकणाऱ्या अन्यायाबाबत आयुक्तांशी सविस्तर चर्चा करण्यात आली. या संपूर्ण प्रकरणाची कोणत्याही दबावाशिवाय, निष्पक्ष आणि पारदर्शक चौकशी करून दोषींवर कठोर कारवाई करावी, अशी मागणी शिष्टमंडळाने केली.
या प्रसंगी राष्ट्रवादी काँग्रेस पार्टी शरदचंद्र पवार पक्षाचे आमदार रोहितदादा पवार व प्रदेश प्रवक्ते ॲड. अमोल मातेले यांनी राज्य सरकारच्या शैक्षणिक धोरणांवर आणि परीक्षा व्यवस्थेतील कथित अनागोंदीवर तीव्र शब्दांत टीका केली.
बारावी आणि MHT-CET गुणांमधील संशयास्पद तफावतीची चौकशी करावी
काही विद्यार्थ्यांना बारावीच्या बोर्ड परीक्षेत तुलनेने कमी गुण मिळाले असताना MHT-CET परीक्षेत अत्यंत उच्च पर्सेंटाईल मिळाल्याबाबत विद्यार्थ्यांमध्ये आणि पालकांमध्ये अनेक प्रश्न उपस्थित झाले आहेत. केवळ गुणांमधील तफावतीवरून कोणताही निष्कर्ष काढता येत नसला, तरी ज्या प्रकरणांबाबत गंभीर शंका व तक्रारी समोर आल्या आहेत, त्यांची तांत्रिक आणि तथ्याधारित चौकशी करणे आवश्यक आहे.
संबंधित विद्यार्थ्यांच्या परीक्षा प्रक्रियेची, उत्तरपत्रिकांची, संगणकीय नोंदींची आणि निकाल प्रक्रियेची पडताळणी करून वस्तुस्थिती जनतेसमोर आणावी, अशी मागणी करण्यात आली.खाजगी परीक्षा केंद्रांबाबत उपस्थित झालेल्या आरोपांची चौकशी व्हावी काही ठराविक खाजगी संगणक प्रयोगशाळा आणि परीक्षा केंद्रांबाबत सोशल मीडियावर विविध ऑडिओ व व्हिडिओ क्लिप्स प्रसारित होत असून, आर्थिक व्यवहारांच्या माध्यमातून पर्सेंटाईल वाढवून देण्यासंदर्भातील गंभीर आरोप करण्यात येत आहेत.
या क्लिप्सची सत्यता, त्यामागील व्यक्ती, संबंधित परीक्षा केंद्रे आणि कथित दलाल यांची स्वतंत्र चौकशी करण्यात यावी. कोणत्याही प्रकारचे रॅकेट किंवा संगनमत आढळल्यास त्यामागील सूत्रधारांवर कठोर कायदेशीर कारवाई करण्यात यावी, अशी मागणी करण्यात आली.
CCTV फुटेज आणि संगणकीय डेटा सुरक्षित ठेवावा
ज्या परीक्षा केंद्रांबाबत तक्रारी किंवा संशय व्यक्त करण्यात आला आहे, तेथील CCTV फुटेज, संगणकीय लॉग्स, सर्व्हर डेटा, परीक्षा सत्रांची तांत्रिक नोंद आणि इतर संबंधित पुरावे तातडीने सुरक्षित ठेवून त्यांची स्वतंत्र तपासणी करण्यात यावी, अशी मागणी शिष्टमंडळाने केली.
चौकशीत कोणताही गैरप्रकार सिद्ध झाल्यास संबंधित परीक्षा केंद्रांचे व्यवस्थापन, दोषी अधिकारी, कर्मचारी, दलाल किंवा इतर संबंधित व्यक्तींवर गुन्हे दाखल करून कठोर कारवाई करण्यात यावी, अशीही मागणी करण्यात आली. आमदार रोहितदादा पवार यांचा सरकारला थेट इशारा
“राज्यातील शिक्षण व्यवस्थेवर सातत्याने प्रश्नचिन्ह निर्माण होत असून, विद्यार्थ्यांच्या भविष्याशी कोणत्याही प्रकारचा खेळ खपवून घेतला जाणार नाही. यापूर्वी ‘बेटरमेंट’च्या नावाखाली विद्यार्थ्यांवर आर्थिक भार टाकण्याचा निर्णय घेण्यात आला होता. विद्यार्थ्यांनी आणि आवाज उठवल्यानंतर सरकारला तो निर्णय मागे घ्यावा लागला.
आता MHT-CET परीक्षेच्या निकालांबाबत गंभीर शंका आणि कथित गैरप्रकारांचे आरोप समोर येत आहेत. या प्रकरणात केवळ चौकशीचे मोघम आश्वासन देऊन चालणार नाही. संपूर्ण परीक्षा प्रक्रिया पारदर्शकपणे तपासून सत्य जनतेसमोर आणले पाहिजे.शांततेच्या आणि लोकशाही मार्गाने आपल्या हक्कांसाठी आवाज उठवणाऱ्या विद्यार्थ्यांवर कारवाई करायची आणि परीक्षा प्रक्रियेतील कथित गैरप्रकारांकडे दुर्लक्ष करायचे, अशी भूमिका सरकारने घेऊ नये. राष्ट्रवादी काँग्रेस पार्टी शरदचंद्र पवार विद्यार्थ्यांच्या पाठीशी खंबीरपणे उभी आहे.
या कथित गैरप्रकारांची वेळेत निष्पक्ष चौकशी झाली नाही आणि गुणवंत विद्यार्थ्यांना न्याय मिळाला नाही, विद्यार्थ्यांच्या न्यायासाठी रस्त्यावर उतरेल,” असा इशारा ॲड. अमोल मातेले यांनी दिला.
ॲड. अमोल मातेले
प्रदेश प्रवक्ते
राष्ट्रवादी काँग्रेस पार्टी शरदचंद्र पवार
