गुवाहाटी, (आसाम) दि. १२ मे -आसाममधील मुख्यमंत्री हेमंता बिस्वा सरमा यांच्या आयोजित शपथविधी सोहळ्यादरम्यान, राष्ट्रवादी काँग्रेस पक्षाच्या राष्ट्रीय अध्यक्षा सुनेत्रा अजितदादा पवार यांनी गुवाहाटी येथील राष्ट्रवादी काँग्रेस पक्षाच्या कार्यालयाला भेट दिली.
गुवाहाटी येथे पोहोचल्यावर सुनेत्रा अजित पवार यांनी आसामचे माजी मुख्यमंत्री आणि राष्ट्रवादी काँग्रेस पक्षाच्या वैचारिक वारशाचा आधारस्तंभ असलेले दिवंगत शरतचंद्र सिन्हा यांच्या पुतळ्याला वंदन केले. यावेळी राज्यसभा खासदार पार्थ पवार, राष्ट्रवादी काँग्रेस पक्षाचे राष्ट्रीय सरचिटणीस अविनाश आदिक हे देखील उपस्थित होते. याशिवाय राष्ट्रवादी काँग्रेस पक्षाचे राष्ट्रीय युवा अध्यक्ष धीरज शर्मा, राष्ट्रवादी काँग्रेस पक्षाचे ईशान्य समन्वयक संजय प्रजापती, राष्ट्रवादी काँग्रेस पक्षाचे राष्ट्रीय कार्यकारिणी सदस्य डी. डी., आसाम राष्ट्रवादी काँग्रेस पक्षाचे प्रदेशाध्यक्ष अजित हजारिका, राष्ट्रवादी काँग्रेस पक्षाचे आसाम कार्याध्यक्ष महेंद्र भुयान, राष्ट्रवादी युवक काँग्रेसचे आसाम प्रदेशाध्यक्ष अनुपाल दास आणि राष्ट्रवादी युवक काँग्रेसचे राष्ट्रीय सचिव विष्णू प्रसाद दास यांच्यासह मोठ्या संख्येने पदाधिकारी आणि कार्यकर्ते उपस्थित होते.
कार्यालयात झालेल्या या संवादादरम्यान सुनेत्रा अजित पवार यांनी पक्षाचे पदाधिकारी, कार्यकर्ते आणि आसाममधील महिलांशी सौहार्दपूर्ण चर्चा केली. या संवादादरम्यान, सुनेत्रा अजित पवार यांनी दिवंगत अजितदादा पवार यांना आदरांजली वाहिली आणि त्यांचा आदर्श, संघर्ष आणि संघटनात्मक वारसा देशभरात पसरवण्याचा आपला निर्धार पुन्हा एकदा व्यक्त केला.
या संवादादरम्यान खासदार पार्थ पवार यांनी पक्षाचे पदाधिकारी आणि युवक कार्यकर्त्यांची भेट घेतली आणि संघटनात्मक बाबीवर सविस्तर चर्चा केली. यावेळी भविष्यात ईशान्य भारतासह आसाममध्ये राष्ट्रवादी काँग्रेस पक्षाचे अस्तित्व अधिक मजबूत होईल आणि आगामी निवडणुकांमध्ये पक्ष महत्त्वपूर्ण भूमिका बजावेल असा विश्वास पार्थ पवार यांनी व्यक्त केला .
