मुंबई, दि. १८: राज्याचे उपमुख्यमंत्री एकनाथ शिंदे यांचे शासकीय निवासस्थान असलेल्या ‘नंदनवन’ बंगल्याने आज एका वेगळ्या भेटीचा अनुभव घेतला. महाराष्ट्र नवनिर्माण सेनेचे अध्यक्ष राज ठाकरे यांनी उपमुख्यमंत्र्यांची भेट घेतली. या भेटीत राज ठाकरे यांच्यातील कलारसिक उपमुख्यमंत्री शिंदे आणि त्यांचे पुत्र खासदार डॉ. श्रीकांत शिंदे यांनी अनुभवला. नंदनवन बंगल्यात लावलेली मुंबईतील हेरिटेज वास्तुंची जुनी छायाचित्रे बारकाईने न्याहळत ठाकरे यांनी त्यातील आठवणी सांगितल्या त्याचबरोबर बंगल्याचा ऐतिहासिक वारसा उत्तम कलाकृतींनी जपल्याबद्दल त्यांनी शिंदे यांचे अभिनंदनही केले.
‘नंदनवन’ ही इमारत एक ऐतिहासिक वारसा असलेली वास्तू आहे. या इमारतीमध्ये जतन करण्यात आलेली दुर्मिळ आणि जुनी छायाचित्रे पाहून ठाकरे भारावून गेले. ही छायाचित्रे बारकाईने पाहताना त्या वास्तुंबद्दलची आठवण देखील त्यांनी सांगितली. हेरिटेज इमारतींसारख्या बांधकामांना प्रोत्साहन मिळावे आणि त्यातून शहराच्या सौंदर्यात भर पडावी यासाठी मी मुख्यमंत्री असताना धोरण केले होते अशी माहिती उपमुख्यमंत्र्यांनी यावेळी ठाकरे यांना दिली.
नंदनवन इमारतीचा हेरीटेज लूक जपतानाच परिसरात देखील त्याचपद्धतीने बांधकाम केले असून या इमारतीच्या परिसराची देखील राज ठाकरे यांनी आवर्जुन पाहणी केली. ठाकरे स्वतः एक उत्तम व्यंगचित्रकार आणि कलेचे चोखंदळ चाहते आहेत. राजकीय धावपळीतही या नेत्याने आपल्यातील कलाकाराला जिवंत ठेवत, ऐतिहासिक ठेव्याचे केलेले कौतुक लक्ष वेधून घेणारे ठरले.
००००
