*शिवसेनेचे उपनेते संजय निरुपम यांची ठाकरे बंधुंवर तीव्र शब्दात टीका
“स्थानिक निवडणुकांपुर्वी जनभावना भडकवण्याचे प्रयत्न सुरू होतात
मुंबई
शिवसेनेचे उपनेते संजय निरुपम यांनी ठाकरे बंधूंवर टीका करताना मुंबईत आयोजित पत्रकार परिषदेत म्हटले की, “उद्धव ठाकरे यांनी सत्तेसाठी काँग्रेसशी युती करून बाळासाहेबांच्या विचारांविरुद्ध पाऊल उचलले. त्याच वेळी, राज ठाकरेंची हिंदी विरोधी आणि हिंदुत्वविरोधी भूमिका बाळासाहेबांच्या मूलभूत विचारांविरुद्ध आहे. ठाकरे ब्रँडचा पाया प्रबोधनकार ठाकरेजींनी घातला आणि बाळासाहेब ठाकरेजींनी त्याला एक ओळख दिली. जोपर्यंत बाळासाहेब होते तोपर्यंत हा ब्रँड जिवंत होता, परंतु आजचे ठाकरे त्यांच्या विचारांपासून दूर गेले आहेत, त्यामुळे ते ठाकरेंचे खरे ब्रँड वारस असू शकत नाहीत”.
निरुपम म्हणाले की,” जेव्हा-जेव्हा बीएमसी निवडणुका जवळ येतात तेव्हा मुंबई महाराष्ट्रापासून वेगळी करण्याचा कट रचला जात आहे , अशी भावनिक भाषा बोलून काही जण लोकांना भडकवत असतात. नुकत्याच ‘सामना’ ला दिलेल्या मुलाखतीत आणि मीरा रोडच्या सभेतही अशाच गोष्टी बोलल्या गेल्या. पण सत्य हे आहे की, मुंबई महाराष्ट्राची होती, आहे आणि राहील. मुंबई महाराष्ट्रापासून वेगळी करण्याचा कोणताही प्रयत्न यशस्वी होऊ शकत नाही. जर कोणी तसे करण्याचा प्रयत्न केला तर शिवसेना त्याला चोख प्रत्युत्तर देईल.”
निरुपम पुढे म्हणाले की, “शिवसेनेचे प्रमुख नेते आणि उपमुख्यमंत्री एकनाथ शिंदे जी हेच बाळासाहेबांच्या तेजस्वी विचारांना पुढे नेत आहेत.”
“ठाकरे ब्रँडच्या वारशाबद्दल बोलणारे त्यांच्या मुलालाही निवडणूकीत जिंकून आणू शकले नाहीत” असा टोला त्यांनी राज ठाकरेंना लगावला. तसेच, आदित्य ठाकरेंवर टीका करताना ते म्हणाले की, “विधानभवनाच्या पायऱ्यांवर बसून सरकारची, मंत्र्यांची खिल्ली उडवणे.” हे ठाकरे ब्रँड असू शकत नाही.
निरुपम पुढे म्हणाले की, “एकनाथ शिंदे जी यांनी अडीच वर्षे मुख्यमंत्री असताना मराठीसाठी अनेक ऐतिहासिक निर्णय घेतले. भाषा, मराठी संस्कृती आणि मराठी माणूस आणि त्यांची अंमलबजावणीही केली. आज मराठी माणसांच्या आदर आणि स्वाभिमानाचे एकमेव प्रतीक एकनाथ शिंदे हे आहेत. आज महाराष्ट्रात फक्त दोनच मोठे ब्रँड आहेत – देवेंद्र फडणवीस आणि एकनाथ शिंदे. शिंदे ब्रँड ठाकरे ब्रँडपेक्षा खूपच मजबूत आणि लोकप्रिय आहे. म्हणूनच जनतेने मोठ्या मतांनी शिवसेनेला विजयी केले.”
निरुपम म्हणाले की, “जेव्हा उबाठाचे बीएमसीवर नियंत्रण होते तेव्हा १३१ मराठी शाळा बंद पडल्या आणि मराठी विद्यार्थ्यांची संख्या ४०% कमी झाली. बहुतेक कंत्राटे उबाठा यांच्याशी थेट संबंध असलेल्या मराठी कंत्राटदारांना देण्यात आली.”
निरुपम यांनी एक मोठा दावा करताना सांगितले की, उबाठाचे ७० ते ७५% खासदार आणि आमदार पक्ष सोडण्याच्या तयारीत आहेत.उद्धव ठाकरेंच्या कार्यशैलीला कंटाळून लवकरच अनेक आमदार पक्षाला निरोप देतील.”
मुंबई लोकल ट्रेन बॉम्बस्फोट प्रकरणात न्यायालयाने सर्व १२ आरोपींना निर्दोष सोडल्याबद्दल निरुपम म्हणाले की,”या प्रकरणाची चौकशी झाली पाहिजे. पुन्हा एकदा सरकार या निर्णयाविरुद्ध अपील करेल आणि चौकशीनंतर, खटला न्यायालयात जोरदारपणे मांडला जाईल. तो न्यायालयात सादर केला जाईल.” असा विश्वास त्यांनी व्यक्त केला.
