> *शिवसेनेकडून दुष्काळी भागात ७ लाख ६९ हजार दिवाळी शिधा किट्स वाटप — ५.३८ लाख वाटले, उर्वरित २ दिवसात — आनंद परांजपे*
*📰 पूर्ण बातमी:*
*शिवसेनेकडून शेतकऱ्यांसाठी ७.६९ लाख दिवाळी किट्स*
मुंबई, ५ नोव्हेंबर — संकटातील प्रत्येक शेतकऱ्याला मदत करण्याच्या उद्देशाने शिवसेनेकडून राज्यातील दुष्काळग्रस्त शेतकऱ्यांना ७ लाख ६९ हजार दिवाळी शिधा संच (किट्स) दिले जाणार आहेत. त्यापैकी ५ लाख ३८ हजार ५०० किट्स वाटप झाले असून उर्वरित २ दिवसात पोहोचतील, अशी माहिती शिवसेना प्रवक्ते आनंद परांजपे यांनी दिली.
बाळासाहेब भवन येथील पत्रकार परिषदेत ते बोलत होते. पक्षाचे मुख्य नेते आणि उपमुख्यमंत्री एकनाथ शिंदे यांनी शेतकऱ्यांसोबत दिवाळी साजरी करण्याचे निर्देश दिले आहेत. पुढील ३ दिवसात शिवसेनेचे मंत्री, आमदार, खासदार शेतकऱ्यांच्या बांधावर पोहोचतील.
*विभागवार वाटप:*
मराठवाडा — १ लाख ७७ हजार
नाशिक — १ लाख ३५ हजार
पुणे — ८२ हजार
अमरावती — ७७,५००
नागपूर — ६६ हजार
उसतोड कामगार — १० हजार
२७८ तालुक्यांतील शेतकरी कुटुंबांना वाटप झाले. राज्य सरकारने ३५८ पैकी ३०४ तालुक्यांत दुष्काळ जाहीर केला आहे.
परांजपे म्हणाले, १९७२ नंतर महाराष्ट्रात भीषण दुष्काळ आहे. सप्टेंबरमध्ये उपमुख्यमंत्री शिंदे यांनी पंतप्रधान नरेंद्र मोदी यांची भेट घेऊन भरीव मदतीची मागणी केली होती. दसरा मेळाव्यात शेतकऱ्यांची दिवाळी काळी होऊ देणार नाही, अशी ग्वाही शिंदे यांनी दिली होती.
दसऱ्याच्या दिवशी ठाण्यातून ६० ट्रक आणि मुंबईतून ४० ट्रक रवाना करण्यात आले होते.
याशिवाय शिवसेनेकडून शेतकऱ्यांच्या पत्नींना २५ हजार शिलाई मशीन, मुलींना २५ हजार सायकली वाटप करण्यात आले. डिसेंबरनंतर सामूहिक विवाह सोहळे आयोजित करणार असल्याचेही परांजपे यांनी सांगितले. दुष्काळग्रस्त भागातील शिवसेना शाखा या शेतकरी सेवा केंद्र म्हणून काम करतील.
—
*
