*११ जुलै रोजी प्रभादेवी येथील रविंद्र नाट्य मंदिरात रंगणार वारकरी परंपरेचा अनोखा कलात्मक आविष्कार; नामभक्ती, संतपरंपरा आणि चंद्रभागेच्या ओलाव्याचा अनुभव रसिकांना घेता येणार*
मुंबई, दि. १० जुलै : महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालय, महाराष्ट्र राज्य, मुंबई यांच्या वतीने ‘ज्याचा विठ्ठल’ या विशेष चित्र-संगीतमय कार्यक्रमाचे आयोजन शनिवार, दि. ११ जुलै २०२६ रोजी सकाळी ११.०० वाजता प्रभादेवी येथील रविंद्र नाट्य मंदिर येथे करण्यात आले आहे. पांडुरंगाच्या वारीतील भक्तिभाव, संतपरंपरेचा आध्यात्मिक वारसा आणि चंद्रभागेच्या तीरावरील पावन वातावरणाचा कलात्मक अनुभव या कार्यक्रमातून रसिकांना घेता येणार आहे.
महाराष्ट्राच्या सांस्कृतिक जीवनात वारकरी संप्रदायाला अनन्यसाधारण महत्त्व आहे. संत ज्ञानेश्वर, संत तुकाराम आणि इतर संतांच्या विचारांनी समृद्ध झालेली वारी ही केवळ धार्मिक परंपरा नसून समता, भक्ती, मानवता आणि सामाजिक ऐक्याचा संदेश देणारी जीवनसंस्कृती आहे. या समृद्ध परंपरेचे कलात्मक दर्शन घडविण्याच्या उद्देशाने ‘ज्याचा विठ्ठल’ या कार्यक्रमाची निर्मिती करण्यात आली आहे.
या कार्यक्रमाचे लेखन डॉ. समीर कुलकर्णी यांनी केले असून दिग्दर्शन अमित वझे यांचे आहे. संगीत संयोजन जयदीप वैद्य आणि निनाद सोलापूरकर यांनी केले आहे. कार्यक्रमातील चित्ररचना प्रसिद्ध चित्रकार मिलिंद मुळीक यांनी साकारली असून प्रकाश योजनेची जबाबदारी सुजय भडकमकर यांनी सांभाळली आहे. साहित्य, संगीत, चित्रकला आणि रंगमंचीय सादरीकरण यांचा सुरेख संगम या कार्यक्रमात अनुभवता येणार आहे.
कार्यक्रमात अंजली मराठे, गजानन परांजपे, अमित वझे, पार्थ उमराणी, केतन पवार, स्वप्नील भावे, ओंकार जोशी, शौनक कुलकर्णी आणि मधुराणी गोखले हे कलाकार सहभागी होणार आहेत. त्यांच्या प्रभावी सादरीकरणातून वारकरी संप्रदायातील भक्ती, श्रद्धा, संतवाङ्मय आणि विठ्ठलभक्तीचे विविध पैलू रसिकांसमोर जिवंत होणार आहेत.
चित्र, संगीत, निवेदन आणि रंगमंचीय अभिव्यक्ती यांचा प्रभावी मेळ साधणारा हा कार्यक्रम पंढरपूरच्या वारीतील अध्यात्मिक वातावरण, हरिनामाचा गजर आणि चंद्रभागेच्या ओलाव्याचा भावस्पर्शी अनुभव रसिकांपर्यंत पोहोचविणारा ठरणार आहे. आधुनिक सादरीकरणाची शैली आणि पारंपरिक भक्तीपरंपरेचा संगम हे या कार्यक्रमाचे प्रमुख वैशिष्ट्य आहे.
सदर कार्यक्रम मा. अॅड. आशिष शेलार, मंत्री (सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता विकास), महाराष्ट्र राज्य यांच्या संकल्पनेतून तसेच मा. डॉ. किरण कुलकर्णी, सचिव, सांस्कृतिक कार्य विभाग यांच्या मार्गदर्शनाखाली आयोजित करण्यात आला आहे. महाराष्ट्राच्या समृद्ध सांस्कृतिक वारशाचे जतन व संवर्धन करणे, अभिजात कला, लोककला आणि थोर संत-कलावंतांचे योगदान नव्या पिढीपर्यंत पोहोचविण्याच्या उद्देशाने सांस्कृतिक कार्य विभागामार्फत विविध उपक्रम सातत्याने राबविण्यात येत आहेत.
या कार्यक्रमास विनामूल्य प्रवेश असून संगीतप्रेमी, वारकरी संप्रदायाचे अभ्यासक, कला रसिक तसेच नागरिकांनी मोठ्या संख्येने उपस्थित राहून या आगळ्यावेगळ्या चित्र-संगीतमय कार्यक्रमाचा लाभ घ्यावा, असे आवाहन श्रीराम पांडे, संचालक, सांस्कृतिक कार्य संचालनालय, महाराष्ट्र राज्य, मुंबई यांनी केले आहे.
